🔷 आत्महत्येचे कारण अद्याप स्पष्ट झालेले नाही
बीड/परळी वैजनाथ :-शहरातील पवनराजे अर्बन निधी या अर्थ संस्थेचे अध्यक्ष प्रल्हाद सावंत ( वय 44 वर्ष) यांनी आत्महत्या केल्याची घटना दि.6 फेब्रुवारी 2024 रोजी सायं. 7 वा. उघडकीस आली आहे. सध्याच्या परिस्थितीत पतसंस्था, मल्टीस्टेट, पतपेढ्या यांच्या आर्थिक अडचणीच्या घटनांमध्ये वाढ झालेली आहे. बीड जिल्ह्यात काही पतसंस्था बाबत प्रश्न उपस्थित होत आहेत. यातच आता परळी शहरातील मोठी आर्थिक उलाढाल असलेल्या पवनराजे अर्बन निधीचे अध्यक्ष प्रल्हाद सावंत यांनी गळफास घेऊन आत्महत्या केल्याची घटना पुढे आली आहे. या घटनेने परिसरात एकच खळबळ उडाली आहे.
प्रेम प्रज्ञा नगर येथील एका अपॉर्टमेंट मध्ये प्रल्हाद सावंत यांनी काही दिवसापूर्वीच घर खरेदी केले होते. या घरात अद्याप ते राहयलाही गेले नव्हते. याच घरात आज दोरीने गळफास घेऊन त्यांनी आत्महत्या केल्याची माहिती समोर आली. या घटनेने खळबळ उडाली आहे. दरम्यान आत्महत्येचे कारण अद्याप स्पष्ट झालेले नाही. पोलिसांनी घटनास्थळी पंचनामा केला. त्यांच्या खिशात कागदपत्रे सापडले आहेत. यातून आत्महत्येचे कारण पुढे येण्याची शक्यता आहे. उत्तरीय तपासणीसाठी उपजिल्हा रुग्णालयात मृतदेह ठेवण्यात आला आहे.
