MAHARASHTRA TOURISM
बांधकाम विभागचे दुर्लक्ष
नाशिक : महाराष्ट्र पर्यटन विकास महामंडळाच्या (एमटीडीसी) माध्यमातून साडेतीन शक्तिपीठांपैकी अर्धे पीठ असलेल्या वणीच्या सप्तश्रृंगगडावरील सार्वजनिक बांधकाम विभागाच्या विश्रामगृहाच्या जागेत पंचतारांकित रिसॉर्ट उभारण्यात येणार आहे. प्रकल्पासाठी आवश्यक जागा हस्तांतरणाबाबत वारंवार पत्रव्यवहार करूनही बांधकाम विभागाने त्याकडे दुर्लक्ष करत असल्याची खात्रीलायक माहिती मिळत आहे. त्यामुळे उभारणीपूर्वीच हे रिसॉर्ट वादात अकडले आहे.
साडेतीन शक्तिपीठांपैकी अर्धे पीठ असलेल्या सप्तश्रृंगगडावर लाखो भाविक आई भगवती चरणी नतमस्तक होतात. त्यामध्ये महाराष्ट्र, गुजरात व मध्य प्रदेशासह देशभरातून येणाऱ्या भाविकांचा समावेश आहे. भाविकांच्या सोयीसाठी गडावरील
सार्वजनिक बांधकाम विभागाच्या विश्रामगृहाचे रिसॉर्टमध्ये रूपांतरण केले जाणार आहे. एक एकर जागेवरील या प्रकल्पासाठी एमटीडीसीने रस दाखविला आहे. मात्र, रिसॉर्ट उभारण्यापूर्वी या जागेचे हस्तांतरण करून घेणे आवश्यक आहे. त्यासाठी एमटीडीसीने चार ते पाच वेळेस पत्रव्यवहार करूनही बांधकाम विभागाकडून अपेक्षित प्रतिसाद अद्यापपर्यंत लाभलेला नाही अशी माहिती हाती आली आहे .
भाविकांसाठी विविध सोयीसुविधा
सप्तश्रृंगगडावर दरवर्षी भक्तांचा राबता वाढत आहे. त्यामुळे या भाविकांसाठी विविध सोयीसुविधा उपलब्ध करून देण्यासाठी शासनाने ८२ कोटी रुपयांचा निधी दिला आहे. उपलब्ध निधीतून गडाचे सुशोभीकरण व विविध विकासकामे केली जाणार आहेत. याच विकासकामांमध्ये एमटीडीसीच्या रिसॉर्टची भर पडल्याने गडाचे सौंदर्य वाढणार आहे.
सार्वजनिक बांधकाम विभागाकडून एमटीडीसीतर्फे राज्यभरात रिसॉर्टची चेन उभारण्यात आली आहे. नाशिक विभागात गंगापूर धरण येथील ग्रेपसिटी पार्क, शिर्डी तसेच भंडारदरा येथे एमटीडीसीचे रिसॉर्ट आहेत. या रिसॉर्टमधून मिळणाऱ्या पंचतारांकित सोयीसुविधांमुळे पर्यटकांच्या ती पसंतीस उतरली आहेत. त्याच धर्तीवर सप्तश्रृंगगडावर रिसॉर्ट उभारले जाणार आहे. पण रिसॉर्टसाठी आवश्यक जमिनीचा ताबा न मिळाल्याने एमटीडीसीच्या या महत्त्वाकांक्षी प्रकल्पाची फाइल धूळखात पडली आहे.
